«Ռոսլին» արվեստի և հումանիտար գիտությունների ակադեմիա

«ՌՈՍԼԻՆ» ԱՐՎԵՍՏԻ ԵՎ ՀՈՒՄԱՆԻՏԱՐ ԳԻՏՈՒԹՅՈՒՆՆԵՐԻ ԱԿԱԴԵՄԻԱ

ԴԻԶԱՅՆ ԱՄԲԻՈՆ
Դասավանդվող առարկաների համառոտ նկարագիրը

«Գծանկարը » Գծանկարի նպատակն է տարբեր գրաֆիկական նյութերով աշխատելու տեսական և գործնական
հիմունքների ուսուցումը, ուսանողի անհատական ուղղվածությունների ու կարողությունների բացահայտումը։
Դասընթացը զարգացնում է այնպիսի կարևոր հիմնական հասկացություններ, ինչպիսիք են ձևը, ծավալը, գիծը, կետը,
լույսն ու ստվերը, ռեֆլեքսը, տարածությունը, հեռանկարը։ Զարգացնում է նկարչական տեսողություն և
կարողություն։
«Գունանկար» Գունանկարի նպատակն է պատկերման գործնական և տեսական հիմունքների ուսուցումը,
կառուցմանը և գունային լուծումներին տիրապետումը։ Դասընթացը ուսանողների մոտ զարգացնում է
գունազգացողություն, տեսողական հիշողություն, երևակայություն, ստեղծագործական գործունեության ակտիվացում։
ՈՒսանողը սովորում է տիրապետել գունանկարի օրենքներին և կանոններին, առաջադրանքում լուծել կառուցվածքի,
կոլորիտի, գունային ներդաշնակության, ծավալային և հեռանկարային խնդիրները։
«Կոմպոզիցիայի հիմունքներ» Առարկայի նպատակն է ուսանողներին սովորեցնել գեղարվեստական նախագծման և
մոդելավորման մեթոդիկան, կերպարային մտածելակերպ, ինչպես նաև ձևաստեղծման և ծավալագոյացման
սկզբունքներ։ ՈՒսումնասիրում է կառուցվածքային և կոմպոզիցիոն էլեմենտները, որոնք օգնում են ուսանողներին
հասկանալ և ստեղծել գրավիչ, տրամաբանական կերպարներ ու պատկերներ։ Դասընթացի խնդիրն է ուսուցանել
ձևագոյացում, հավասարակշռություն, հորիզոնական ու դինամիկ հարաբերությունների կառուցում,
ներդաշնակություն և հակադրություններ, որոնք հանդիսանում են յուրաքանչյուր արվեստի գործի հիմնաքարերը։
«Գունատեսություն» Գիտություն է գույնի մասին ,որն ուսումնասիրում է գույնի կիրառումը մարդու պրակտիկ
գործունեության տարբեր ոլորտներում։ Այն գեղարվեստական ինքնատիպ արտահայտչամիջոց է և
հնարավորություն է տալիս նախագծողին իրագործել իր մտահղացումները։ Ուսանողները ծանոթանում են
գունագոյացման և գունային տեսակների / քրոմատիկ և աքրոմատիկ/ հետ։
«Գրաֆիկական դիզայն» Դասընթացի ընթացքում ուսանողներն ուսումնասիրում են գրաֆիկական ձևավորման
տարրերը՝ տպագիր և թվային մեդիա կիրառմամբ։ Հիմնական ուշադրությունը բևեռվում է պատկերների, գույների,
տառատեսակների, կոմպոզիցիայի և ընդհանուր ձևավորման վրա՝ նպատակ ունենալով ստեղծել գործնական և
գեղագիտականորեն գրավիչ աշխատանքներ։ Ուսանողները սովորում են տիրապետել գրաֆիկական դիզայնում
օգտագործվող գործիքների և տեխնիկաների ՝ Adobe Photoshop, Illustrator, InDesign ծրագրերը, ինչպես նաև
սովորում են ստեղծել լոգոներ, բրենդային տարրեր, գովազդային պաստառներ, կայքեր և այլ տեսակի գրաֆիկական
նյութեր։

«Արխիտեկտոնիկա» առարկան ուսումնասիրում է տարածության ձևավորման սկզբունքները, որոնք հիմք են
հանդիսանում նախագծերի և ծավալների կառուցման համար։ Դասընթացը կենտրոնանում է ձևերի,
համաչափության, ինչպես նաև նյութերի և կառուցվածքային համակարգերի ճիշտ կիրառման վրա՝ նպատակ
ունենալով ստեղծել գրավիչ, կայուն և գործնական ճարտարապետական լուծումներ։ Ուսանողները ուսումնասիրում
են ձևի ու գործառույթի հարաբերությունները՝ պարզելով, թե ինչպես կարելի է նախագծել ճարտարապետական
ծավալներ, որոնք ոչ միայն էսթետիկ են, այլև գործնական և ֆունկցիոնալ բնույթ են կրում։ Դասընթացի
ընթացքում ուշադրություն է դարձվում նաև գույների, տարածության, լույսի և ստվերի ազդեցությանը նախագծի
վրա՝ ստեղծելով ներդաշնակ միջավայր։
«Հագուստի կոմպոզիցիա» առարկան ուսումնասիրում է հագուստի դիզայնի ձևավորման հիմնական սկզբունքները՝
ընդգծելով համադրության, նյութերի, գույների, կառուցվածքների ու ձևերի ներդաշնակությունը։ Դասընթացը
սովորեցնում է ստեղծել այնպիսի հագուստ , որում համատեղվում են գեղագիտական գեղեցկությունը և
հարմարավետությունը՝ հաշվի առնելով ֆիզիկական չափսերը, մարմնի առանձնահատկությունները և տեսողական
ազդեցությունը։ Ուսանողները սովորում են կոմպոզիցիայի տարրերը՝ հավասարակշռություն, հակադրություն,
ներդաշնակություն։
«Ինտերիեր, էքստերիեր» առարկան ուսումնասիրում է շենքերի և այլ տարածքների ներքին (ինտերիեր) և
արտաքին (էքստերիեր) դիզայնի սկզբունքները։ Դասընթացն ընդգծում է թե՛ ֆունկցիոնալ, թե՛ գեղագիտական
բաղադրիչները, որոնք անհրաժեշտ են ապահովելու ինչպես գործնական, այնպես էլ տեսողական արժեքներ՝
միաժամանակ ստեղծելով ներդաշնակ և էսթետիկ միջավայր։ Ինտերիերի դիզայնի դասընթացին ուսանողները
ուսումնասիրում են տարածության ճիշտ կազմակերպման, լուսավորության, գույների, նյութերի և խորշերի
ձևավորման կարևորությունը՝ նպատակ ունենալով ստեղծել մթնոլորտ, որը կհամապատասխանի տարածքի
գործառույթներին և մարդու պահանջներին։ Էքստերիերի դիզայնը կենտրոնանում է շենքերի արտաքին տեսքի վրա՝
ընդգծելով ճարտարապետական ձևերը, ֆասադները, մուտքերը, պատուհանները, գույները և նյութերի ընտրությունը,
որոնք պետք է համապատասխան լինեն շրջակա միջավայրին և մշակութային համատեքստին։
«Հագուստի նախագծում» առարկան ուսումնասիրում է հագուստի ստեղծման գործընթացը՝ ընդգծելով դիզայնի,
ֆունկցիայի և գեղագիտական տեսանկյունից կարևորվող տարրերը։ Դասընթացը կենտրոնանում է հագուստի
մոդելավորման, ոճավորման, կտորների ընտրության, ձևելու և բաղադրիչների համադրության վրա՝ նպատակ
ունենալով ստեղծել գործնական, գեղագիտական և նորարարական հագուստի նախագծեր։ Ուսանողները ծանոթանում
են մոդելավորման գործընթացին՝ սկսած գաղափարի ձևավորումից մինչև ավարտուն հագուստի պատրաստում։ Այն
ներառում է նկարչություն, գծագրություն, մոդելավորում և սիլուետների մշակման տեխնիկա։ «Հագուստի
նախագծում» առարկան ընդգրկում է նաև նորագույն մեթոդների և տեխնոլոգիաների կիրառումը, ինչպիսիք են
համակարգչային ծրագրերը (CAD համակարգեր), որոնք օգնում են ստեղծել ճշգրիտ և պրոֆեսիոնալ նախագծեր։
«Տարազի պատմություն» առարկան ուսումնասիրում է հայ ազգային տարազի էվոլուցիան՝ անցնելով պատմական,
մշակութային և սոցիալական համատեքստերում: Առարկայի շրջանակում ուսանողները ծանոթանում են տարբեր
ժամանակաշրջաններին, հայկական զարդերին, դրանց ծագմանը , ինչպես նաև կանանց և տղամարդկանց տարազին
բնորոշ առանձնահատկություններին։

«Գունավոր գրաֆիկա» առարկան կենտրոնանում է գունային տիրույթում աշխատանք ստեղծելու ու կիրառելու
հիմունքների վրա։ Առարկայի ընթացքում ուսանողները սովորում են գույնի տեսության, գունային
համադրությունների, ինչպես նաև գրաֆիկական ձևավորման հիմնարար սկզբունքները։ Դասընթացը ընդգրկում է
գունային լեզվով հաղորդակցություն, պատկերային կոմպոզիցիաներ ստեղծելու տեխնիկաներ, ինչպես նաև թվային
գրաֆիկայի ծրագրերի կիրառումը՝ գունավոր համադրությունների իրականացման համար։ Ուսանողները ծանոթանում
են գույնի հոգեբանական ազդեցությանը, սովորում են ճիշտ օգտագործել գույնը գրաֆիկական աշխատանքներում։

«Համակարգչային նախագծում» առարկան վերաբերում է դիզայնի և ստեղծագործական այլ աշխատանքների
իրականացմանը համակարգչային ծրագրերի միջոցով։ Դասընթացը կենտրոնանում է տարբեր նախագծման ծրագրերի
ուսումնասիրության վրա, որոնք օգտագործվում են գրաֆիկայի, 3D մոդելավորման, դիզայնի և անիմացիայի համար։
Ուսանողները ծանոթանում են գրաֆիկական դիզայնի հիմունքներին՝ համատեղելով ստեղծագործական գաղափարները
և տեխնիկական հմտությունները։ Առարկայի ընթացքում ուսանողները սովորում են աշխատել ծրագրերի հետ,
ինչպիսիք են Adobe Photoshop, Illustrator, CorelDRAW, Autodesk AutoCAD, Blender և այլ մուլտիմեդիա
ծրագրեր։ Դասընթացը ընդգրկում է ինչպես 2D, այնպես էլ 3D նախագծման, վիզուալ էֆեկտների ստեղծման ու
կետային գրաֆիկայի պատրաստման տեխնիկաները։

«Հագուստի տեխնոլոգիա» առարկան ուսումնասիրում է հագուստի արտադրության բոլոր փուլերը՝ նախագծումից
մինչև պատրաստի արտադրանքի ստացում։ Դասընթացի ընթացքում ուսանողները ծանոթանում են հագուստի
արտադրության տեխնիկական գործընթացներին, մաքսիմալ արդյունավետ և ճշգրիտ արտադրություն կազմակերպելու
մեթոդներին, ինչպես նաև դրա որակի և խնայողականություն ապահովելու հնարավորություններին։

«Էրգոնոմիկա» Էրգոնոմիկան գիտություն է, որն ուսումնասիրում է մարդու կամ մի խումբ մարդկանց
աշխատանքային գորըծնթացը արտադրությունում, նպատակ դնելով օպտիմալացնել կիրառվող գործիքները և ամբողջ
աշխատանքային պրոցեսը: Էրգոնոմիկայի հետազոտման օբյեկտն է /մարդ-մեքենա-միջավայր/ ամբողջ համակարգը,
որտեղ ուսումնասիրվում են մարդու և առարկայական աշխարհի հարաբերությունները աշխատանքի գործընթացում:
Էրգոնոմիկան որպես կոմպլեքսային գիտություն կազմավորվել է այնպիսի տեխնիկական գիտությունների
հանգույցում, ինչպիսիք են հոգեբանությունը, ֆիզիոլոգիան, հիգիենան,անատոմիան, բիոմեխանիկան,
անտրոպոմետրիան, կենսաֆիզիկան:

«Հեռանկար» առարկայի դասընթացում դիտարկվում են հարթ և եռաչափ երկրաչափական ձևերի մտահղացման և
ճշգրիտ նկարագրման մեթոդները: Հեռնկարը ուսումնասիրում է ձևը տարածության մեջ, ստվերների արտացոլման
և մակերևույթների ձևագոյացման օրենքները և հիմնախնդիրները,որոնք վերաբերվում են դիզայների
ստեղծագործության բնագավառին:

«Գծագրություն» Առարկան ուսուցանվում է որպես տեխնիկական և գեղարվեստական զարգացման միջոց։ Այն
ընդգրկում է տեխնիկական գծագրության հիմունքները, որոնք կիրառվում են դիզայնի, ճարտարապետության և այլ
բնագավառներում։ Ուսանողնորը սովորում են գծագրական հմտություններ, զարգացնում են գրաֆիկական,
տարածական և վերացական մտածողությունը։ Սովորում են գծագրերի ընթերցում և ստեղծում, աքսոնոմետրիայի և
պրոյեկցիոն կառուցումներ։

«Դիզայն նախագծում» Ուսուցանում է դիզայնի հիմնական սկզբունքները, գործիքները և տեխնիկաները, նպատակ
ունենալ ով սովորեցնել ուսանողներին գործնական մեթոդներ՝ դիզայն նախագծեր իրականացնելու համար։
Նպատակն է ուսանողների մոտ ստեղծել խորացված հասկացողություն և հմտություններ դիզայնի տարբեր
ասպեկտներում՝ տեսողականից մինչև գործնական: Դիզայնի հիմնական սկզբունքներն են կոմպոզիցիան, գույնը,
ֆունկցիոնալությունը, հարմարավետությունը։ Ուսանողները սովորում են իրականացնել նախագծեր բիզնես և
մարքեթինգային պահանջներին համապատասխան, կատարել գործնական աշխատանքներ՝ թիմային նախագծեր,
ուսումնական առաջադրանքներ։ Նախագծի իրագործման ընթացքում ուսանողները պետք է կատարեն իրենց
աշխատանքները՝ ստանալով համապատասխան առաջադրանքներ: Օգտագործվում են տարբեր գործիքներ, ծրագրեր և
ռեսուրսներ (օրինակ՝ Adobe Creative Suite, AutoCAD, Sketch, Figma):
«Բիոնիկա»  Կիբեռնետիկայի բաժին է, որը կենդանի բնության մեջ օրգանիզմների ու համակարգերի ֆունկցիաների
ուսումնասիրության հիման վրա, տարբեր ճարտարագիտական խնդիրների լուծման նպատակով, ստեղծում է
տեխնիկական սարքեր ու համակարգեր։ Այս գործընթացը ներառում է թիմային աշխատանք, որտեղ ուսանողները
կարող են ստեղծել և ներկայացնել դիզայն նախագծեր՝ օգտագործելով կենսաբանական մոդելները ։ Կենդանի
օրգանիզմների կառուցվածքային առանձնահատկությունների ուսումնասիրությունները ծնում են նոր գաղափարներ
տեխնիկական կոնստրուկցիաների ստեղծման համար։

«Աշխատանք նյութով» Գործնականում տարբեր նյութերի հետ աշխատելը հնարավորություն է տալիս առավել
արտահայտիչ կերպով ցուցադրել դիզայների մտահղացումը մանրակերտում։ Պատշաճ ընտրված նյութը
հնարավություն է տալիս ամբողջովին դրսևորել օբյեկտի բնույթը և կառուցվածքը, ցույց տալ առարկայի
պլաստիկությունը և համաչափությունը, այս ամենը առավել ճշգրիտ արտահայտել գույնով: